Bişkekdə “Manas eposu və türk dastançılıq ənənəsi” monoqrafiyası rus dilində nəşr edilmişdir

Bişkek, 27 dekabr (AzərTAc). Bişkekdəki Türkdilli Ölkələrin Siyasətinə Dəstək Fondu tərəfindən şair və alim Adil Cəmilin “Manas eposu və türk dastançılıq ənənəsi” monoqrafiyası “Biyiktik” nəşriyyatında rus dilində çapdan çıxmışdır.
Azərbaycanda qırğız eposu Manasın tədqiqinə həsr olunmuş bu ilk elm-tədqiqat əsəri 2002-ci ildə Bakıda Azərbaycan, 2011-ci ildə isə rus dilində nəşr edilmişdir.
Kitabın rəyçiləri Qırğızıstan Milli Elmlər Akademiyası Dil və Ədəbiyyat, həmçinin Manasşünaslıq institutlarının direktoru, bir sıra beynəlxalq akademiyaların həqiqi üzü, “Çingiz Aytmatov” Akademiyasının prezidenti, akademik Abdıldacan Akmataliyev, Azərbaycan Milli Elmlər Akademiyasının müxbir üzvü, Milli Məclisin deputatı Nizami Cəfərov və professor İsmayıl Vəliyevdir.
Türkdilli Ölkələrin Siyasətinə Dəstək Fondunun sədri Nüsrət Məmmədov bildirmişdir ki, monoqrafiya Azərbaycan Qırğızıstan folklor əlaqələrinin öyrənilməsi, iki qardaş xalq arasında ədəbi, mədəni əlaqələrin daha da möhkəmlənməsində mühüm rol oynayacaqdır.
Onun sözlərinə görə, qırğız oxucularının böyük marağını nəzərə alaraq tanınmış şair və tərcüməçi Mukan Asanaliyev monoqrafiyanı qırğız dilinə də tərcümə edir. Əsərin nəşri 2012-ci ilin birinci yarısına nəzərdə tutulmuşdur.

Qulu Kəngərli
AzərTAc-ın xüsusi müxbiri
Bişkek