"Dədə Qorqud Günü" keçirilib

Hər ilin aprel ayında AMEA Folklor İnstitutunda artıq ənənəyə çevrilmiş "Respublika Dədə Qorqud günü" keçirilir. Aprelin 8-də mövzuda keçirilən tədbiri institutun direktoru, professor Hüseyn İsmayılov açıb. "Dədə Qorqud Kitabı"nın ulusal və bəşəri əhəmiyyəti vurğulanıb. AMEA-nın müxbir üzvü Tofiq Hacıyev və Fəxrəddin Baxşəliyev ""Dədə Qorqud kitabı" şeirinin misra həcmi haqqında", Əzizxan Tanrıverdi "Dədə Qorqud kitabı"ndakı "Baybörə oğlu Bamsı Beyrək" antroponimik modeli digər türk mənbələrindəki (Orxon-Yenisey abidələri, "Manas", "Alpamış"...) antroponimlər müstəvisində", Asif Hacıyev "Dədə Qorqud kitabı"ndakı bəzi məlum arxaizmlər haqqında", Yaşar Qasımov isə "Dədə Qorqud kitabı"nda dünya, ümumtürk və Oğuz motivlərinin sintezi" mövzusunda maraqlı çıxışlar ediblər. Bədi hissədə AMEA Folklor İnstitutunun "İrs" ansamblının ifasında "Dədə Qorqud" kitabından örnəklər qədim havacatların müşaiyətilə səsləndirilib, qədim el mahnıları oxunub.