Seyfəddin Rzasoyun “Oğuz mifinin strukturu” adlı doktorluq dissertasiyasının müzakirəsi keçirilib

7 oktyabr 2009-cu il tarixində AMEA Folklor İnstitutunun Mifologiya şöbəsində filologiya elmləri namizədi Seyfəddin Rzasoyun “Oğuz mifinin strukturu” (oğuz mətnləri əsasında semiotik bərpa) adlı doktorluq dissertasiyasının müzakirəsi keçirildi. Tədbirə f.e.d, professor Füzuli Bayat sədrlik edirdi. Müzakirədə həmçinin f.e.d. M.Kazımoğlu, f.e.d. K.Əliyev, f.e.d. K.Allahyarov, f.e.d. Ə.Tanrıverdi, sənətş.e.d. R.İmrani, fəls.e.d. F.Qurbanov, f.e.n Ə.Ələkbərli, f.e.n. S.Xavəri, f.e.n R.Kamal, f.e.n. E.Abbasov, f.e.n O.Əliyev, f.e.n Nailə Rəhimbəyli, f.e.n. M.Abdullayeva da iştirak edirdilər.
Müzakirədə alimlərə öncədən təqdim olunmuş doktorluq dissertasiyasının ayrı-ayrı cəhətləri haqqında hərtərəfli mülahizə və iradlar qeyd olundu. Eyni zamanda, tədbirdə dissertasiyanın Ali Attestasiya Komissiyasının tələblərinə uyğunluğundan, mövcud elmi ədəbiyyatlardan istifadə səviyyəsindən, eləcə də, özünəqədərki tədqiqatlardan fərqi, müəllifin tədqiqatın obyekti və predmetinə yanaşma metod və metodologiyası kimi mühüm məsələlərdən geniş şəkildə bəhs olundu. Müzakirə prosesində dissertasiyada mövcud olan bəzi çatışmazlıqlar, əlavə və çıxarışlar haqqında da danışıldı.
Nəticə kimi demək olar ki, müzakirə uğurlu alındı və təqdim olunmuş dissertasiyanın bəzi əlavə və dəyişikliklər edilməklə növbəti mərhələyə buraxılması tövsiyə edildi.

AMEA Folkor İnstitutu Mətbuat Katibi Hikmət Quliyev